【遊戲評測】《Curse of the Dead Gods》Dark Soul 式 Hardcore Player向Rough-lite待更新遊戲

【遊戲評測】《Curse of the Dead Gods》Dark Soul 式 Hardcore Player 向 Rough-lite待更新遊戲 #

小弟何師傅會繼續努力希望可以寫到做到更多文章媒體能夠吸引到更多朋友一齊投入打機，享受遊戲。

繼上次評測《Hades》，一款以Rough-lite爽快見稱遊戲之後，
碰巧今次要介紹既作品就係剛剛係Steam上面推出既《Curse of the Dead Gods》（《CotDG》下同），
從Trailer上面睇佢都係以Rough-lite、Dungeon式及爽快感作賣點既遊戲，
出之前Steam同Reddit既網民已經將哩隻同《Hades》一齊比較，
既然剛剛寫完就有同類型遊戲，仲要99蚊，咁無辦法喇，唯有一鍵付款推動遊戲產業。

Reddit 除左好多痴線佬之外，其實都有部份Post 係有營養，好推介大家多Ｄ去蒲下。

廠商及遊戲基本簡介可以參考返VJGamer九哥阿九既哩篇新聞，係哩度就不作重覆介紹。
值得一提既係《CotDG》目前都係Early Access，未來仲會係Console上面推出，但係究竟佢最後會唔會成功推出市面，
小弟就覺得未來既Patch同Update 將會成為其中一個關鍵，因為目前真係好Early去講佢值唔值得Access，
小弟會陸續解釋。而今次哩篇文章會分兩大部份，分別係遊戲介紹同何師傅點睇去評測。

《CotDG》既Early Access到底成唔成功，未來既更新真係好關鍵。

首先故事方面，《CotDG》暫時係無故事可言，係真正既無故事，係０呀。
所以故事會係後面既感想部份講解，敬請留意，密切期待！

《CotDG》特色可以分為四個部份：武器，遺跡（Relic），詛咒及玩法。
遊戲開始主角鬍鬚哥會有火把，主武單手劍同副武手鎗一把作為初始武器，地城路上將會有不同武器換取，
操作上亦大有不同；武器除左種類之外仲會分等級，屬性及技能，
可能一把低Level低攻武器附帶既屬性同技能會吸引過高攻但無任何特性既武器，
所以每一次換武器都要慎重考慮，因為當玩家換左武器之後，手持個把武器係過版後無左，無得食Orb of Regret。

由回血低攻變左無回血高攻真係魚與熊掌。

除左武器之外，《CotDG》特色之二就係遺跡（Relic，即係技能），《CotDG》既技能係有吸引之處，
當然一定會有雞肋技能，例如體質＋３咁即係加Ｄ血，亦都有非常實用既技能例如「暴擊吸血％」，
更加有相當有趣既「得到３００％受到傷害的金錢」，質你一拳比返三蚊你等等既有趣技能；
另一重點之處就係技能可以堆疊！如果運氣好的話可以將暴擊吸血％堆到某個程度，
咁就可以輕鬆爆機；反觀如果你手持五個一拳三蚊，但係頂得三拳，最多都係得十五蚊連個飯盒都買唔到就可以重開。

同武器一樣會出現好多魚與熊掌配雞骨既情況出現，可以諗好耐都未決定到。

《CotDG》既Curse即係詛咒。每過一個版圖就會加２０，上限為１００；每當玩家去到武器／技能／配點報酬既時侯，
玩家可以用錢去買，還是用詛咒去換。每當詛咒值去到滿既時侯，過版就會隨機得到一個詛咒（Debuff），
其中有無傷大雅既陷阱連發，亦有嚴重影響遊戲難度既幻覺，受傷後畫面會變成黑白。而去到第五個詛咒，
會一路扣血直到得返一血，就算有吸血都會繼續扣，直到過版／死。所以《CotDG》入面，
除左武器同技能配搭之外，資源（錢，血及詛咒值）既運用亦都需要考慮清楚。

有Ｄ詛咒係有一定好處，同時亦有只有壞處，而最後一個詛咒就同極限打法一樣一下就死。

癲狂視界除左令難度提高之外仲令玩家有極強既挫敗感，嘜都睇唔到真心想扔制。

當三個特色溝埋一齊之後，最令人又愛又恨既玩法亦係《CotDG》最值得討論既地方。
遊戲有五格體力（Stamina），各種動作消耗既體力亦都唔一樣，例如翻滾（碌）消一格，連技消一格，
蓄力消兩格等等。而無曬體力之後，只可以自動回。《CotDG》怪物既血量，密度同難度都係好高，
人地快狠準，我地頓廢盲，割草同無腦係《CotDG》入面係唔可行，所以就算你已經齊裝，
又無中到較難既詛咒，你都可以比幾隻小怪玩死，所以體力控制又係《CotDG》入面一個課題。

所以《CotDG》入面係有完美檔格（Parry）等等比玩家作回避，亦即係話，如果你有受到隻狼式特訓，
知道怪物Pattern 同禁制時機，原則上你係可以唔換武器爆機，只係時間問題，
當然啦，魔界村都可以既，所有Action Game原則上都做得既。

普攻打怪係我地硬直人地反擊，無雙打法係會死得好慘。

遊戲過程中會囉到一定數量既骷髏頭骨，可以用黎強化出關前既被動技能及Reroll次數，
所以嚴格上黎講《CotDG》係Rogue-Lite 因為佢每一個Run都仲有小小小小量影響到下一個Run。

遊戲介紹就到哩度為止，總括黎講算係市場上獨有既Dark Soul版既Rogue-Lite Action Adventure Game，
難度同挑戰性都好相當高，特別係回避同檔格要求的確係Dark Soul程度；而可發展空間都十分大，始終仲係Early Access。

目前黎講《CotDG》入面既被動技其實同無既分別唔算好大，亦無需要刻意去Farm。

黎到個人感想哩部份，我地首先簡單講下有咩小弟認為，《CotDG》既PROs / CONs可以分為：

PROs：

• 有繁中，玩落去有一定親切感；

• 港幣＄９９，始終有一定吸引力，有D Game＄９９蚊一口都抽唔到；

• Steam平台，而且未來仲會繼續更新。

暫時係咁多。

哩個港幣＄９９真係要考慮，唔係因為價錢問題，係價值問題。

哩個有排講，踐踏的確容易過讚美好多：

• ０故事性及投入度：目前為止都仲未知鬍鬚哥叫咩名，同埋除左鬍鬚哥既痛楚聲，叫聲之外，係一句語音都無，
  搞到好似打網球咁「呀。」「啊！」。故事方面坦白講係Early都未到因為根本未開始做。哩個問題其實不大，
  不過會令到玩家既投入度降低好多，因為最基本既目的性都帶唔到比玩家。

0 Dialogue令到就算比人殺死左都無咩感覺，令人難以投入遊戲當中。

• Rogue-Lite****部份，《CotDG》進入Dungeon之前已經可以Plan好區域路線，
  換句話說即係入Dungeon 之前你已經推算到你將會有幾多次抽武器／技能既機會，
  唔計World Drop同Boss Drop的話，玩家已經有基本估算到你個角色可能會有幾多件裝／技能獲得。
  相比《Hades》玩家每過一層先知下層報酬既感覺，初玩《Hades》既未知感會更易有一種期待（同失落）既感覺，
  而哩種感覺係令到遊戲重玩度高好多，因為未知先係Rogue-Lite****遊戲特點，亦係《CotDG》相比之下既缺點之一。

二簡一VS Preview路線圖，證明有d野真係唔知好過知。

• 重玩度低作業感過重：一二三四關既分別只係長度同難度，最後一次打到第四關最後一Part既時侯，
  係同第三關最後一Part完全一樣，技能同武器都只係數字上重覆加強同疊加，
  未有見到好特別既打法，結果打爆機為既係強逼症，而唔係設計師帶黎既遊戲性；
  十四個鐘其實係好少好少，但小弟已經產生厭倦，我唔想返入去個窿度呀；

• 隨機性過重實際變化小：當打到一段時間之後會發現，暫時遊戲變化其實唔大，
  來不去都係爆擊吸血Sustain、擊暈硬直玩安定等等，然而要實現相關打法就要依賴裝備技能，
  如果你抽唔中相關物品，最後都係去返熱血硬派之硬砌，砌唔嬴就硬輸；

• 難度及門檻過高：哩一點係好值得討論，一個好既遊戲，小弟認為要做到一個效果就係，
  Hardcore Player****可以挑戰極限，Causal Player可以輕鬆暢遊，
  大家都可以係同一個遊戲上面得到滿足感，成功感同娛樂性；
  換句話說，隻Game可以好難，同時應該做到易學難精，所以平衡度好緊要。
  可惜小弟感覺《CotDG》暫時只有重視到Hardcore Player，
  普通玩家會因為難度同上手問題卻步，有朋友玩左五分鐘死左三次即刻Refund。

仲有好多小問題：優化差會Lag機；０介紹無講解過暗黑同光明有咩特別之處；火把作用模糊等等等等；

綜合評分：65（以目前為止計算，大型更新可令遊戲評分可升可跌。）

總括黎講，首先99蚊既價格會幫佢囉到一定分數，而我相信Hardcore Player亦會因為難度同挑戰性夠高而喜愛，
所以Steam Review入面9/10係有原因，起碼我玩到頭一兩個鐘既時侯都仲覺得佢值哩個分數。

Steam Review 9/10 好似好吸引，其實Review既數量才六百零，所以高分唔一定岩客人口味。

然而，問題遂一出現，重玩度低同平衡度差暫時黎講係死症，真係好難吸引Causal Player，難搞難搞。

所以承接上文所講，《CotDG》往後既更新真係會令到個遊戲可唔可以繼續玩落去，
如果做返少少Fine Tune，小弟覺得去返７０分都可以接受為一隻好遊戲。
回想《Hades》係Epic Store出既時侯都同而家好唔同，
而剛剛《Hades》又有一個大型更新，所以更新先係Early Access既重點。

繼The Long Winter之後又出左The Nighty Night，綜合黎講《Hades》的確抵玩好多。

今次就無特別打王Game play附上喇，獻醜不如藏拙呀嘛，師傅自己都覺得羞家。

無咩事我返去打POE喇因為三月份Path of Exile 3.10 Delirium League（POE 3.10）
係香港時間3月14號早上就會開始，到時如果做好左Build Guide的話再同大家分享。😊

多謝大家收睇，同樣地有咩問題同改善希望可以指點一下，謝謝你。

By Snakie002何師傅

YouTube: Snakie002

FB Page: Snakie002

Twitch: Snakie002

Blog: Snakie002hosifu